Виктор Куллэ

1962 йилда Киров областининг Кирово-Чепецк шаҳрида туғилган. Ленинград аниқ механика ва оптика институтининг физик-муҳандислик факультетида ўқиган, А. М. Горький номидаги Адабиёт институтини ва унинг қошидаги аспирантурани тугатган. Филология фанлари номзоди. Иосиф Бродский ижоди бўйича мутахассис. «Литературное обозрение» журнали ва «Летний сад» нашриётида бош муҳаррир бўлиб ишлаган. «Палимпсест» (2001), «Всё всерьез» («Ҳаммаси жиддий») (2011) ва «Миннатдорчилик» (2020) шеърий китобларининг, «Стойкость и Свет» («Матонат ва зиё») (2017) шеърий тўпламлар муаллифи. Инглиз, итальян, Россия халқларининг тилларидан шеърлар таржимони. Россиянинг «Культура» ва «Первый канал» телеканаллари учун дастурлар ва сценарийлар яратган. М. Ломоносов, А. Грибоедов, М. Цветаева, Г. Газданов тўғрисидаги ҳужжатли фильмлар, Иккинчи жаҳон урушидаги хотин-қизлар тўғрисидаги сериал сценарийларининг муаллифи. «Новый мир» журнали мукофоти, «LericiPea Mosca» Италия-Россия мукофоти, А. М. Зверев номидаги мукофот, Янги Пушкин мукофоти ва ҳоказо мукофотларнинг лауреати. Москвада яшайди.
Файласуф ва адабиётшунос Георгий Гачев шундай ёзган: «Виктор Куллэ шеърияти — бу тасаввур жарчиси, ҳаёт гуноҳи ва кулгуси, жўшқин тафаккур, бой луғавий таркиб, тембрлар таронаси, ўйноқи ассоциациялардир...».