Յուրի Պոլյակով
Յուրի Պոլյակով (ծնվ. 1954 թ.) — արձակագիր, լրագրող, հրապարակախոս, դրամատուրգ և բանաստեղծ, հասարակական գործիչ: ՌԴ կառավարության և Մոսկվայի, Գոգոլի, Շչեդրինի անվան և մի շարք այլ մրցանակների դափնեկիր:
Ծնվել է Մոսկվայում՝ բանվորի ընտանիքում: Ավարտել է Մոսկվայի Ն. Կրուպսկայայի անվան շրջանային մանկավարժական ինստիտուտի (МОПИ, ներկայումս` МГОУ) ռուսաց լեզվի և գրականության բաժինը: Բանասիրական գիտությունների թեկնածու է, պաշտպանության թեզի թեման եղել է ռազմաճակատային պոեզիան: 2001—2017 թթ. եղել է «Литературная газета»-ի գլխավոր խմբագիրը:
1974 թ. գրականություն է մուտք գործել որպես բանաստեղծ: Յուրի Պոլյակովի առաջին վիպակները՝ «Շրջանային մասշտաբի արտակարգ իրավիճակ» և «Հարյուր օր՝ հրամանից առաջ», լույս են տեսել «ՅՈՒՆՈՍՏ» ամսագրում: «Սխալների ուղղում» և «Թագազրկում», «Կոստյա Գումանկովի փարիզյան սերը» վիպակներում ձևավորվեց գրողի ոճը, որը քննադատները որակեցին որպես «գրոտեսկային իրականություն»: Հեղինակի վեպերից են՝ «Ուլը կաթի մեջ», «Որոշել էի փախչել...», «Սնկային թագավորը» վեպի «Զգայական (մարմնական) վիպակներ» շարքը, երգիծական հերոսապատման «Գիպսե փողհարը», «Սերը վերափոխումների դարաշրջանում» և այլն: Պոլյակովի պիեսները հաջողությամբ բեմադրվում են ռուսական և եվրոպական բեմերում: Նրա վառ հրապարակախոսությունը («Լևիաֆանը և Լիբերաֆանը», «Ո՞ւմ եք դուք պետք, մշակույթի վարպետներ» և այլն) անփոփոխ կերպով տեղիք է տալիս բանավեճերի:
Պոլյակովի արձակն անփոփոխ կերպով սոցիալական է և գերժամանակակից: Նա սուր ծաղրով է նկարագրում նոր հերոսներին և նոր կյանքի դրսևորումները, միաժամանակ նրա ծաղրը հաճախ անցում է կատարում քնարականության, իսկ սոցիալական պաթոսը՝ հումորային փափուկ կարոտախտի:
