Кўк қалпоқда қолсанг болалигингча...
* * *
Кўк қалпоқда қолсанг болалигингча,
ўзинг билан ўзинг ер қучоғида.
Дайдисанг ёлғону ростлар оралаб,
сентябрнинг учаётган япроғида.
Хиёбонда кезсанг, ўриндиқ танлаб,
танлаб ҳу ўшани — ўша боғловчин
ўтмиш ва келажак ипин умрбод.
Кетишинг — қайтишинг шу ерга, тайин.
Қандай севар эдим кўк халқоб ичра
четан мевалари, кузнинг сифати —
хазонлиғ акс этган ва ўртасида
шеърлар битилган ул ғамгин суратни.
Гарчи жарангларди бошида улар,
қолдирмади ўздан ҳеч бир эсдалик.
Сурат узра ёмғир томган сингари
ё балки мутлақо у бўлмагандек.
Лек бола, лоақал, тартиби учун
юзига кафтини босди, жимгина
шеър ёза бошлади дафтарга шу кун,
сатрлар югурди қараб сўнгига.
