Телбавор қарайсан: осмон — осмондай...

* * * Телбавор қарайсан: осмон — осмондай. Муздай тубсиз ўпқон. Сен аллақачон Бўлгансан. Дарвоқе, сен бўлмагансан — шунчаки, бўлгансан аҳён ва аҳён гоҳ учоқ, тез ёрдам уловида гоҳ; қийналиб топилган қофияда ҳам... Эсла, болаликда ёлғондан учдинг. Энди эса жиддий учяпсан бу дам: тўхтатиш кранин тортиб, Боингдан чиқдинг — парвоздасан беном, бенишон, Мартин Иден каби теран, юксакроқ — замин сари, ўзга нигоҳдан пинҳон.