Кунимизнинг сокин олтинин узоқ...

* * * 

Кунимизнинг сокин олтинин узоқ
чўян бурчакларда куйлайди тузоқ
ва тонгги зулматда чайқалган бот-бот,
яланғоч ҳолдаги бошоққа дўнар,
унда урён соя игнага қўнар,
ҳамда сурбет қалай қоқади қанот.
Заъфар остонадан чиқармиз эрта,
авлодлар сузмаси ётади ерда
топталган, сиқилган уюм ва уюм,
вагон нозири ҳам йиғлайди юм-юм,
трамвай дўндирар қора кукунга
ҳамда тарвақайлаб майда ёғар қор,
сўнгги ҳосил билан таратар ифор.

Тўлиқ куйланмаган етилган ватан,
бундан зўрроқ минғирламаган
шитирлоқ куй — чалғи, чалғичига ҳам.
Чиқсак тонг олдидан қоронғуда тек,
трамвай тарақлар четда анордек,
орқа вагонда биз эмасмизми жам?
Муздек танга билан эгик тан ила
латта-ла ўралган найза тагида
қор қоплаган майда туриш биз учун
энг тўғри йўл эди, лек мирза у кун
йиртгандек бир вароқ кўк китобидан,
чалғичи чалғини кўтариб беун
титраб кетар ўз шитобидан.