Azmanların çiyinlərindəki cırtdanlar

Heç də hər azmanın vaxtı və həvəsi olmur cırtdanları dəstəkləyə. Amma cırtdanlar azmanları, heç olmasa, hissə-hissə dəstəkləməyə imkan tapırlar: budur cırtdan azmanın qaraciyərini dəstəkləyir — azman bezib onu çiyinlərində oturdur. Budur, cırtdan ağciyəri dəstəkləyərək, onun nəfəs almağına və ilhama gəlməsinə mane olur, azman çiynindəki cırtdana tərəf tüpürür. Budur, cırtdan atlant ədasıyla azmanın ürəyini dəstəkləyib pıçıldayır ki, ürəkdə əsas olan mədəcikdir, azman əsəbiləşib cırtdanı oradan çölə çıxarır və çiyinlərində oturdur. Cırtdanlar azmanın göz almacıqlarını dəstəkləyirlər, orada əks olunan göy üzünü dişləyirlər, qulaq boşluğuna girib damcı-damcı oğurlayırlar okeanın səsini. Onlar sümük kimi uzanırlar ağızda, təki azmanın nitqinə qarışa bilsinlər, yumruq kimi birləşib, azmanın onurğa beyninə girirlər, birləşib sağ və sol beyin yarımkürəsini itələməyə çalışırlar. Onların hamısı azmanın çiyinlərində toplaşır, onun çiynini döyəcləyirlər, ürək cırtdanları, fikir cırtdanları, nitq cırtdanları, ruh cırtdanları — onlar yad çiyinlərin hündürlüyündən asılaraq oxuyub oynayanda adamın az qalır nəfəsi kəsilə və bir də görürsən ki, onların qulaqbatırıcı ansamblı altında sən özün də oynayırsan.